कर तिर शाहरुख

सुपरस्टार शाहरुख खानलाई आयकर विभागले सूचना जारी गरेको छ । समाचार एजेन्सी पिटिआईका अनुसार आयकर विभागले शाहरुखलाई संयुक्त अरब इमिरेट्समा रहेको उनको एक भव्य महलको कर तिर्न सूचना पठाएको छ ।

सन् २००८/०९ मा एक कम्पनीको प्रचार गरेबापत शाहरुखलाई सो महल या भिल्ला उपहारका रूपमा प्राप्त भएको थियो । यसको मूल्य लगभग १८ करोड भारु छ । यस उपहारलाई आफ्नो व्यवसाय या कामबाट भएको आयको हिस्सा मान्न नसकिने शाहरुखको भनाइ छ । अपि्रल २००९ मा उनले आयकर विभागलाई आफ्नो घर, व्यवसाय, सम्पत्ति आदि गरी करिब एक अरब २६ करोड भारुबराबरको आय देखाएका थिए । उनले आयकर विभागलाई दिएको प्रतिवेदनमा द पाम, जुमेरा, दुबईमा ८५०० वर्ग फिटमा बनेको दुईतले महललाई नखिल पब्लिक ज्वाइन्ट स्टक कम्पनीबाट प्राप्त भएको उपहारका रूपमा उल्लेख गरेका थिए । तर, आयकर विभागले उनको यस जवाफलाई अस्वीकार गर्दै डिसेम्बर १० मा दोस्रो नोटिस पठाएको थियो जसमा यस महललाई कर लगाउन योग्य बताइएको थियो । विभागले कम्पनीले शाहरुख खानलाई ब्रान्ड एम्बेसडरका रूपमा प्रयोग गरेकाले महललाई उनको आयकै रूपमा लिनुपर्ने बताएको छ ।