सुहागरात-टिप्पणी

विभिन्न पेसाका व्यक्तिले आफ्नो सुहागरातको बयान यसरी गरेछन्ः

पत्रकारः उच्च स्रोतका अनुसार सुहागरात भव्य रूपले सम्पन्न भएको छ　। तर, यसमा पर्याप्त कमीकमजोरी रहेको असन्तुष्ट पक्षको दाबी छ　। दुवै पक्ष लेनदेनमा गम्भीर र इमानदार हुनुपर्ने विश्लेषकहरू बताउँछन्　।

क्रान्तिकारीः हाम्रो महान् तथा गौरवशाली पार्टीको निर्देशनबमोजिम हामीले अग्रगामी छलाङ लगाएका छौँ　। हामीले ल्याएको भूकम्पले सामन्तीको मुटु हल्लाएको छ　। तर, क्रान्ति सकिएको छैन भन्नेमा हामी विश्वस्त छौँ　।

शिक्षिकाः राम्ररी गृहकार्य नगरी आएका रहेछन्　। कान निमोठिदिएँ　। किताब खोल्न लगाएर पढ्न लगाएँ　। रिपिट एगेन, रिपिट एगेन (फेरि दोहोर्‍याऊ) भन्दाभन्दै रात छर्लंगै भएछ　।

　 डाक्टरः बिरामीको नाडी छामेँ, निधार छामेँ　। ज्वरो आएको रहेछ　। 'सिटामोल खानु' भनेँ　। जाँचेको फि भने लिनै बिर्सिएछ　।

　 ड्राइभरः गियर भाँच्चियो, ब्रेक फेल भयो　। एक्सिडेन्ट भयो　। धन्न, कसैको ज्यान गएन　। 　

कविः रात झलमल्ल थियो, सयौँ सूर्य एकैचोटि उदाएझैँ　। आनन्दको इन्द्रेणी प्रफुल्ल मुद्रामा उपस्थित थियो　। पूर्णरुपेण फक्रेको गुलाबको मादकतामा सारा वातावरण लठ्ठ थियो　। 　

नर्सः नम्बर नभएको बेडमा बिरामी छट्पटिरहेका थिए　। रातभरि 'आराम गर्नुस्, आराम गर्नुस्' भनिरहेँ　।

व्यापारीः धेरै लगानी गरियो　। पर्याप्त जोखिम लिइयो　। एक वर्षभित्र नाफा आउला कि !

चुनावी उम्मेदवारः प्रेमको पोस्टर टाँसियो　। चुम्बनको भोट मागियो　। जनताको सेवामा अहोरात्र खटियो　।