राजधानीमा पनि हिउँ पर्‍यो

काठमाडौं, माघ २ - चिसो बढेसँगै आइतबार राजधानी वरपरका डाँडाहरुमा पनि हिउँ पर्न सुरु भएको छ ।
दिउँसोदेखि पश्चिमदेखि आउने बायुको मात्रा बढेसँगै राजधानी वरपरका डाँडाहरुमा हिउँ पर्न सुरु भएको हो । 'पश्चिदेखि आउने बायुको मात्रा बढेपछि नागार्जुन, चन्द्रागिरी, नरकोटलगायतका ठाउँमा फुसफुसे हिउँ पर्न थालेको छ,' मौसम पूर्वानुमान महाशाखाका उपमहानिर्देशक मणिरत्न शाक्यले भने, 'बेलुकासम्ममा अझै बाक्लो हिउँ पर्ने सम्भावना छ ।
राजधानीको तल्लो भागमा भने बाक्लो हिउँ पर्ने सम्भावना नरहेको शाक्ले बताए । चाबहिल, थली, डाँछी, मूलपानी, चाँगुनारायणलगायतका क्षेत्रमा पातलो हिउँ फुसफुसाएको थियो । नगरकोटमा दिउँसोदेखि हिउँ खेल्न जानेको भीड सुरु भएको छ ।

राजधानीमा आइतबार अपरान्ह सिमसिम पानी परेपछि चिसो बढेको छ । 'भोलिदेखि केही दिन अझै चिसो बढ्ने सम्भावना छ,' उनले भने ।
यसैबीच मुलुकका उच्चपहाडी जिल्लाहरुमा आइतबारदेखि बाक्लैगरी हिउँ पर्न सुरु भएको छ । संखुवासभा, हुम्ला, मुगु, गोरखा, लमजुङ, दोलखालगायतका जिल्लाहरुमा हिउँ पर्न थालेको मौसम पूर्वानुमान महाशाखाले जनाएको छ ।