किसुनजी निवासमा ढिस्कोले पुरिएर तीन मजदुर ठहरै

पूर्वप्रधानमन्त्री एवम् सन्तनेता कृष्णप्रसाद भट्टराईको बाडेगाउँस्थित घरको कम्पाउन्ड निर्माण गर्ने क्रममा ढिस्कोले पुरिएर तीन मजदुरको मृत्यु भएको छ।

सोही क्रममा पुरिएका दुई मजदुरको प्रहरीले सकुशल उद्धार गरेको छ। गएको माघ २८ गतेदेखि पर्खाल निर्माण गर्न थालेका ती मजदुरको पर्खालको जग खन्ने क्रममा सात फिटको गहिरो खाल्डोमा माटोको ढिस्कोले पुरिएर मृत्यु भएको हो। मृत्यु हुनेमा ३३ वर्षीय भालु लामा २१ वर्षीय सन्दीप घलान र अन्दाजी २८ वर्षीय कान्छा तामाङ रहेका छन्। मृत्यु हुनेमध्ये तामाङ मकवानपुर टिस्टुङ र अन्य दुई जना धादिङका रहेको प्रहरीले जनाएको छ।

घाइते हुनेहरुमा वीरबहादुर लामा र सुवास थोकर रहेका छन्। लामा धादिङ र थोकर टिस्टुङका हुन्। घाइते दुवै जना खतरामुक्त छन्। ँजग खन्दै थियौं अचानक माटोको ढिस्कोले पुरियो चिच्याएर सहयोग माग्यौं। प्रहरीले बल्लतल्ल तानेर हामी दुईलाई समयमै अस्पताल पुर् याएर बचायो’ -पाटन अस्पतालमा उपचार गराइरहेका घाइते थोकरले नेपाल समाचारपत्रसँग भने।

धन्न भगवान्ले हामीलाई बचाए सँगैका तीन जनालाई दैवले चुँडेर लग्यो’ -अर्का घाइते लामाले भने। घाइते थोकरको करङ र दायाँ खुट्टा तथा लामाको छातीमा चोट लागेको छ।

बिहानको खाना खाएपछि काममा गएका सातमध्ये दुई जना जगबाहिर र पाँच जना खाल्डोमुनि माटो झिक्ने र फाल्ने काम गरिरहेका थिए। खाना खाएपछि एकछिन आराम गरेर काम गर्न गएका थिए तिर्खा लागेर पानी खान मागे बाल्टिनमा पानी ल्याएर खान दिएँ पानी खाएको केही समयमै माटोको ढिस्कोले पुरेर तीन जना साथीको मृत्यु भयो -साथीलाई खाना पकाएर खुवाउने र सँगै काम गर्ने रामकृष्ण शर्माले नेपाल समाचारपत्रसँग वेदना पोख्दै भने- सँगैका साथीले अकालमै ज्यान गुमाए साथीहरु पुरिनासाथ सँगै रहेका पेटी ठेकेदार एम्बुलेन्स लिन जान्छु भनेर गए तर उतैबाट फरार भए । शर्माले भने- कोही नदेखेपछि रोई-कराई गरेँ नजिकैको प्रहरीचौकीमा गएर प्रहरी र गाउँलेलाई बोलाएँ करिब आधा घण्टापछि मात्र साथीहरुको उद्धार भयो।

प्रहरीले पुरिएर मृत्यु भएका तीन जनाको शवसँगै उनीहरुले प्रयोग गरेको साबेल र थुन्चेसमेत निकालेको थियो। समयमै प्रहरी नपुगेको भए सबैको मृत्यु हुन सक्ने बताउँदै महानगरीय प्रहरीपरिसरका प्रमुख प्रहरी उपरीक्षक एसपी विक्रमसिंह थापाले भन्नुभयो- समयमै प्रहरी घटनास्थल पुगेकाले थप दुईको सकुशल उद्धार भयो।

हिजो आइतबारसम्ममा जग खनेर पीसीसी गरी आज सोमबारदेखि वाल लगाउने काम गर्ने गरी ठेकेदारले अह्राएको थियो हतारमा काम गरेकाले यस्तो घटना भयो -निवासमा चौकीदारको समेत काम गर्ने गरेका शर्माले भने। गत असारदेखि शिवाको कालिका देवीस्थान कन्स्ट्रक्सनले १ करोड ४७ लाख रुपियाँमा ठेक्कामा लिएको सो कार्य सम्पन्न हुनुअगावै अप्रिय घटना भएको छ।

घटनापछि प्रहरीले सो कम्पनीका सुपरभाइजर सीताराम आचार्यलाई पक्राउ गरेको छ भने ठेकेदारको खोजी भइरहेको ललितपुर प्रहरीप्रमुख एस्पी थापाले बताउनुभयो।

गएको भदौमा उक्त भवनको पर्खाल भत्कदा घरलाईसमेत क्षति पुर्याएपछि पर्खाल बनाउन थालिएको थियो। कांग्रेस नेता पीएल सिंहले सरकारको कमजोरीका कारण अपि्रय घटना हुन गएको बताउनुभयो। घटना भएको स्थल किसुनजी बस्ने घरसँगै रहेको छ। हाल उहाँ करिब दुई सातादेखि उपचारार्थ थापाथलीस्थित नर्भिक अस्पतालमा भर्ना भएका बेला अप्रिय घटना भएको हो। सो घटनालगत्तै सयौंको संख्यामा स्थानीयवासी र नेपाली कांग्रेसका नेता उहाँको निवास बाडेगाउँमा पुगेका थिए।