ब्रायनसँग गाउने बृन्दा सिंह

रकस्टार ब्रायन एडम्सको लाइभ फुल ब्यान्ड शोअन्तर्गत शनिबार दशरथ रंगशालामा भएको काठमाडौं संस्करणमा ५१ वर्षीय गायकलाई साथ दिने २७ वर्षीया बृन्दा सिंह यतिबेला चर्चामा छिन् । कन्सर्टमा गाउनुअघिसम्म बैंकर रहेकी उनी यतिबेला नयाँ सेलिबि्रटी बनेकी छन् । ब्रायनसँगै 'बेबी ह्वेन यु आर गन आई रियलाइज आई एम इन लभ' (प्रिय, तिमी गएपछि मैले आफू प्रेममा परेको महसुस गरें) गीत हाँसीहाँसी गाउने उनले हेलो शुक्रबारकालाई भनिन्, त्यो साँझ मेरो जीवनकै धेरै ठूलो उपलब्धि रह्यो र म धेरै रमाएँ । ब्रायनसँग गाएपछि सहरमा धेरैले 'को हो त्यो केटी, स्वर बबाल रै'छ' भनेर चासो राखिरहेका बेला उनले व्यक्तिगत र विगतबारे नबोल्ने सर्त राख्दै शनिबारको रात र त्यस सेरोफेरोमा गरेको संवाद विस्तारमा ।

तपाईंको पेसा ?

बैंकर हुँ । तीन वर्षदेखि बैंक अफ काठमान्डुमा छु । सुरुका दिन यसै बैंकको ज्ञानेश्वर शाखाको कार्ड डिपार्टमेन्टमा काम गरें । अहिले केन्द्रीय कार्यालयमा 'करपोरेट कम्युनिकेसन अफिसर' छु । अध्ययनतर्फ काठमाडौं विश्वविद्यालयबाट एमबीए र त्रिचन्द्रबाट समाजशास्त्रमा स्नातकोत्तर सकेकी छु ।

कन्सर्टमा जाने योजना कसरी तय भयो ?

धेरैअघि उनी आउने जानकारी पाएकी थिएँ । लक्ष्मी बैंकमा काम गर्ने साथी प्रसन्न केसीले एक महिनाअघि टिकट लिइसकेका थिए । कन्सर्टको दिन मसहित ५ जना साथी थियौं ।

ब्रायन कन्सर्ट कस्तो रह्यो ?

समग्रमा स्मरणीय रह्यो । तर नेपाली ब्यान्डहरूको प्रस्तुति अलि राम्रो भएन् । मेहेनत अलि पुगेन कि जस्तो महसुस गरे ।

कन्सर्टमा गाएपछिको प्रतिक्रिया कस्तो छ ?

कन्सर्टमा थुप्रै गएका रहेछन् । सकिएपछि साथी/आफन्त सबै भेटिए । त्यस दिन चिच्याउँदै गाइयो । कार्यक्रम सकिएपछि दरबारमार्गको केएफसीमा चिसो खाइयो । स्वरै भासियो । अझै ठीक भाको छैन । धेरै बधाई पाइरहेकी छु । कतिपयले सेलिबि्रटी भयौ भन्छन् । तर म नर्मल लाइभमा फर्किसकें । दैनिक बैंकिङ काममा फर्किसकें । बैंकको नाम आयो राम्रै रेसपोन्स भइरहेको छ । सरहरू पनि खुसी हुनुहुन्छ । उहाँहरूलाई पनि रेसपोन्स आइरहेको छ ।

ब्रायनसँग गाएको क्षणबारे तपाईंका धारणा ?

त्यो भाग्य र अवसर दुवै हो । २० हजारको भीडबाट मै छानिएँ । गाइसकेपछि मिडियाको ध्यान केन्द्रित होला र फेम होला भन्ने कल्पना गरेकी थिइनँ । गाउन पाएँ । खुसी छु ।

ब्रायनले बोलाउला भन्ने अनुमान थियो ?

थियो । तर कसलाई भन्ने मात्रै हो । मेरा साथीहरू त गीत रटेर गएका थिए । किनकि ब्रायनले प्रायः कन्सर्टमा 'समर अफ सिक्स्टी नाइन' र एट्टीन टिल आई डाई' मा दर्शक बोलाउने गरेको छ ।

कन्सर्ट हुँदैन भन्ने हल्ला पनि थियो ?

हो, सुनेकी थिएँ । घरमा हूलदंगा/भागदौड होला नजाउ भनिरहेका थिए । तर म आँट गरेर गएकी थिएँ । भागदौड भइहाले हामीहरूले मञ्चतिर भाग्ने योजना बनाएका थियौं । किनकि त्यस्तोमा प्रायः सबै गेटतिर दौडिने भएकाले । अर्को कुरा भाग्न सजिलो होस् भनेर सजिलो जुत्ता लगाएकी थिएँ । रंगशाला पस्दा करिब ३० मिनेट लाइनमै बस्नुपर्‍यो । खुलामञ्चमा गाडी पार्किङ गरेर हिँड्दै त्रिपुरेश्वर पुगेका थियौं ।

कार्यक्रमभर ध्यान केमा थियो ?

त्यस दिन सेन्टर अफ अट्रयाक्सन उनी (ब्रायन) नै थिए । मैले उनलाई नै हेरिरहें । माहोल र ब्यान्डका अन्य सदस्यमा ध्यान मोड्ने मौकै पाइएन ।

तपाईं नै कसरी छानिनुभयो ?

उनले गीतमा साथ दिन सोधेपछि साथीहरूले मेरै हात उठाइदिरहेका थिए । उनीहरू 'तैं जा तैं जा' भनी हौस्याइरहेका थिए । त्यसबेला ब्रायन 'स्पट लाइट' को उज्यालोमा साथी खोज्दै थिए । उनी गाना र शब्द आउँदैन भने नआउनुहोस् पनि भनिरहेका थिए । त्यो सुनेर धेरैका हात तल परे ।

जब स्पट लाइट भीडको बायाँ किनारमा हानियो कसैका हात उठेनन् । सेन्टरमा हान्दा म लगायत अरूका हात पनि उठिरहेका थिए । तर उनको रोजाइमा मै परेछु । बारनिर पुगेकी थिएँ । उनले स्टेजबाटै फेरि पक्कापक्की गरे । सक्छौ, नसके स्टेजबाट फाल्दिन्छु ? मैले 'सक्छु' भनें । त्यसो भए आऊ । उनले बोलाएपछि दुई सुरक्षाकर्मीले मेरो शरीरको पछाडि भागबाट जुरुक्क उचालेर स्टेजमा उकाले ।

स्टेजमा ब्रायनको रेस्पोन्स कस्तो थियो ?

म काठमान्डुवासी थाहा पाउँदा जति खुसी थिए तर मेरो पेसा बैंकर बताउँदा उनले मुख खुम्च्याएका थिए किनकि बैंकिङ सिरियस पेसा हो । आममानिसलाई जस्तै उनलाई पनि बैंकरहरू बाहिर निस्किएर गाउन सक्दैनन् भन्ने धारणा थियो कि ?

सँगै गाउँदा कस्तो अनुभव भयो ?

डोयटजस्तो । म उनको प्रस्तुति नबिगरियोस् भन्नेमा सचेत थिएँ । गाउँदा हाम्रो कम्युनिकेसन भइरहेको थियो । आँखामा आँखा जुधाउँदै गाइरहेकी थिएँ । किनकि त्यो टिमवर्क थियो । जब उनले लिड गितार बजाउँदै धुन निकाले । के उभिरहनु जस्तो भयो । मैले नाचेर इन्ज्वाए गरें ।

अँगालोमा बेरिँदाको अनुभव ?

त्यो माहोलमा जो भए पनि मेरो जस्तै गथ्र्यो । केटा मान्छे भए पनि त्यो हुन्थ्यो । त्यसमा के नराम्रो छ । मैले त्यो क्षणमा इन्ज्वाए गरें । घरका अभिभावकले रातिमात्रै विस्तृत थाहा पाए । ब्रायनले ब्याक स्टेजमा 'गुड लक' भन्दै दिएको गितार पिक र टिसर्ट देखाएँ । उहाँहरूले स्याबासी दिनुभयो ।

संगीत पढ्नुभएको छ ?

छैन । सन् २००४ मा एउटा एल्बम निकालें । त्यसपछि गायन रोकिएको छ । भविष्यमा के गर्छु थाहा छैन । अहिले बैंकिङ नै रमाइलो छ ।

म प्रेमध्वज प्रधान, १९७४ एडी सुन्छु । हिन्दी सिनेमा हेर्छु, प्रायः शनिबार छुटाउँदिन । नेपाली सिनेमा त्यति हेरिँदैन । दोहोरी गीत कहिलेकाहीँ टिभीमा हेरिन्छ त्यति नै हो । प्रायः अंग्रेजी गीत मन पराउँछु । गीत सुन्न एप्पलको आइपड साथमै रहन्छ ।

प्रेम सम्बन्धबारे ?

त्यो नभनौं । तपाईंले व्यक्तिगत कुरा नसोध्ने भन्नु भा'हैन र ?