ससुरालीमा आगजनी, सासुमाथि खुकुरी प्रहार

उदयपुर जिल्लाको उत्तर पहाडी गाविस बलम्तामा एक ज्वाइँले ससुराली घरमा शनिबार विहान आगजनी गर्नुका साथै सासुलाई खुकुरी प्रहार गरी गम्भीर घाइते बनाएका छन्। छिमेकी गाविस ताम्लिछा ५ का मन्दीप राईले शनिबार विहानै बलम्ता ४ माझगाउँका बखतराम राईकी श्रीमती जयनसरी राईलाई जथाभाबी खुकुरी प्रहार गरी गम्भीर घाइते तुल्याएको प्रत्यक्ष दर्शीले बताएका छन्।

शुक्रबार राति १२ बजेतिर ससुराली आइपुगेका उनले आवेशमा आएर सासुमाथि जथाभाबी खुकुरी प्रहार गरेका थिए। ज्वाइँको खुकुरी प्रहारबाट ५२ वर्षीया जयनसरीको टाउकोमा १८ वटा टाँका लगाउनुपरेको छ भने हातमा पनि चोट लागेको स्थानीय इलाका स्वास्थ्य चौकी बलम्ताले जनाएको छ। सासुमाथि प्रहारपछि घर, मतान र गुवालीमा आगो सल्काएर जलाइदिएको स्थानीय लैनसिंह राईले बताए।

सासुमाथि प्रहारपछि श्रीमतीलाई आक्रमण गर्न खोज्दा उनी भागिसकेकीले आक्रमणबाट बचेको बताइएको छ। 'छिमेकीको घरमा गएर नलुकेकी भए श्रीमतीलाई मार्ने थियो धन्न बाँचिन्' एक प्रत्यक्षदर्शीले भने। उनले श्रीमतीलाई नभेटेपछि घरभित्र रहेका तामाका गाग्री र अन्य सामान पनि काटेर ध्वस्त बनाएका छन्।

विहान ३ बजेसम्ममा सबै अपराध गरिसकेर भागेका उनी अहिलेसम्म फरार रहेको स्थानीयले बताएका छन्। उनको खोजिमा युवाटोली परिचालन गरिएको छ। आगजनी गर्नेक्रममा ससुरा बखतराम घरमा थिएनन्। एकदिनअघि सुनकोसीछेउ गोदेलीघाट भन्ने ठाउँमा रहेको खेत झरेका उनलाई घटनालगत्तै स्थानीय युवाहरुको टोली लिन पठाएर घर ल्याइएको स्थानीय देवराज राईले बताए।

छिमेकीका अनुसार एक महिनाअघि कान्छी साली १६ वर्षीया बिनालाई हम्बरले हिर्काएर गम्भीर घाइते बनाएका मन्दीप गाउँ छाडेर भागेका थिए। सधैं दिदीसँग झगडा गर्ने कारण सोध्दा एक्कासी आक्रमणमा परेकी बिनाको उपचारमा अढाई लाख रुपैंया खर्च भएको र सो रकम तिराउन खोज्दा उनी भागेका थिए। सालीमाथि आक्रमण गरेर भागेपछि ससुरालीसँग उनको विवाद उत्कर्षमा पुगेको देवराजले बताए।

स्थानीयका अनुसार ताम्लिछा ५ छत्तिवनेका राई अवकाशप्राप्त नेपाली सेनाका जवान हुन्। ४५ वर्षीय उनी बखतरामको जेठी छोरी सैंमीका श्रीमान् हुन्। सैंमी उनका तेस्री श्रीमती हुन्। उनीसँगको एउटा सन्तान रहेको जनाइएको छ।

आक्रमणकारी राईसँग बिष्फोटकजन्य हतियारसमेत भएको स्थानीयले जनाएका छन्। उनी कोसी तरेर दिक्तेलतर्फ गएको अनुमान गरिएको छ।

प्रारम्भिक अनुमानअनुसार आगजनीबाट १२ लाख बढीको क्षति भएको गाविसका पूर्व अध्यक्ष बसन्त राईले बताए। घटनाबारे स्थानीयले प्रहरीलाई खबर गरिसकेको जनाएका छन्। जिल्ला प्रहरी प्रमुख नायव उपरीक्षक मनोज यादवले इलाका प्रहरी कार्यालय झिल्के इनामेबाट टोली पठाएको बताए।

घटनास्थ्ल सदरमुकामदेखि २१ कोश उत्तरमा दुर्गममा छ। तत्काल प्रहरी पुग्न नसक्ने हुनाले साँझसम्ममा विस्तृत जानकारी आउने प्रमुख जिल्ला अधिकारी कुमार श्रेष्ठले बताए।