टेकुमा लुटेरा समूहले गोली प्रहार गर्दा एक जनाको मृत्यु

टेकुमा बिहीबार साँझ लुटेरा समूहले गोली प्रहार गर्दा एक जनाको मृत्यु भएको छ भने अर्का एक जना घाइते भएका छन्।

टेकुमा रहेको एक्साइड ब्याट्री कारखानामा लुटेरा समूहले गोली चलाउँदा सो कारखानामा कार्यरत प्रेम महर्जनको मृत्यु भएको छ भने सुदीप बस्याल गम्भीर घाइते भएका छन्। तीन जनाको समूहमा आएका लुटेराले नाइन एमएमको पेस्तोलबाट गोली प्रहार गरेका थिए। गोली प्रहारबाट घाइते पाल्पाका सुदीप बस्याललाई नर्भिक अस्पतालमा उपचारार्थ भर्ना गरिएको छ। दुवैको कोखामा गोली लागेको थियो।

बिहीबार बेलुकी करिब सवा आठ बजे भएको सो घटनामा मृत्यु भएका महर्जन एक्साइड ब्याट्री कारखानाका प्राविधिक हुन्। घाइते बस्याल सो कारखानाका टेलिफोन अपरेटर भएको प्रहरीले जनाएको छ। लुटेराहरुलॆ रकम माग्दा नदिएको भन्दै गोली प्रहार गरेको महानगरीय प्रहरी परिसर काठमाडौंका प्रहरी प्रमुख प्रहरी उपरीक्षक एसपी पुष्कर कार्कीले बताउनुभयो। फरार लुटेराहरुको उपत्यकाका सबै नाका बन्द गरेर खोजी कार्य भइरहेको जानकारी उहाँले दिनुभयो। घटनास्थलमा पुग्नुभएका एसपी कार्कीले सोही स्थानबाट सेटबाटै सबै ठाउँमा सुरक्षा जाँच कडा पार्न मातहत निकायलाई निर्देशन दिनुभएको थियो। लुटेरा समूहले सो कम्पनीका सुरक्षागार्ड गोविन्द अधिकारीलाई नियन्त्रणमा लिएर दुई कर्मचारीमाथि गोली प्रहार गरेका थिए।

लुटेरा समूहले तीन राउन्ड गोली प्रहार गरेको थियो तीमध्ये महर्जन र कार्कीलाई एक-एक गोली लागेको थियो। तीन जनाको समूह कारखाना प्रवेश गर्नासाथ रकम मागेको र कर्मचारीहरुले आफूसँग रकम नभएको बताएपछि गोली प्रहार गरेको प्रत्यक्षदर्शीले बताए। सधैं नौ बजे गाडी थन्क्याएर घर जाने ती कर्मचारीहरु घर जाने तयारी गरिरहेका बेला लुटेरा समूहले गोली प्रहार गरेका थिए। बा५च ७५१४ नम्बरको सर्भिस सवारीमा काम गर्ने महर्जन काम सकेर आउनासाथ लुटेरा समूहले रकम माग गर्दै कारखानाको तेस्रो तलामा रहेका सुदीप भएको स्थानमा लगेका थिए।

काम सकेर घर जाने तरखरमा रहेका सुदीप कार्यालयमै नुहाएर बसिरहेका थिए। सोही समयमा कार्यालयको बैठक कक्षमा गोली प्रहार गरिएको थियो। कम्पनीका सुरक्षा गार्ड गोविन्द भण्डारीका अनुसार कर्मचारी कार्यालयमा आउना साथ उनीहरु पनि सँगै आएका थिए। तर गार्डले केही नगरेपछि सरासर माथिल्लो तलाको बैठक कक्षमा उक्लेका उनीहरुबीच झगडा भएको जस्तै आवाज आएपछि मात्रै सुरक्षा गार्ड माथिल्लो तलामा उक्लेका थिए। दुई जना मंगोलियन र एक जना बाहुन जस्तो अनुहार भएका अपरिचित व्यक्ति आएको प्रहरीले दाबी गरेको छ। सो ब्याट्री कम्पनी सिपद्री ट्रेडिंगको अधिकृत विक्रेता भएको पनि प्रहरीले जनाएको छ।

प्रहरीले घटनामा संलग्नता रहेको आशंकामा गार्ड अधिकारीलाई तत्कालै पक्राउ गरेको छ। गोली प्रहार गर्नासाथ लुटेरा समूह सानेपा हुँदै फरार भएका थिए। घटना भएलगत्तै वीर अस्पताल पुर्याइएका महर्जनको केही समयपछि मृत्यु भएको थियो भने अर्का घाइते बस्याललाई थप उपचारका लागि थापाथलीस्थित नर्भिक अस्पताल लगिएको थियो।