राशिफल लेख्ने मुर्ख कि पढ्ने मुर्ख ?

दिपध्वनी

पत्रिका हातमा परिसकेको हुन्न, कतिपयलाई हतार हुन्छ आजको राशिफल कस्तो छ हेर्नलाई । राशिफल धेरै किसिमले हेरिदा रहेछन् । कोही कोही राशिफलमा पुरै विश्वास गर्ने, राशिफलमा मित्र भेट लेखेको छ भने चिट्टिक्क परेर साथी भेट्न निस्किने । कोही कोही अनलाईन भएका साथी भेटेर राशिफल मिल्यो भन्ने अनि कोही कोही राम्रो लेखेको छ भने आत्मविश्वास बढ्छ, मिल्नु नमिल्नु त के भयो र भन्दै राशिफल हेरिदिने । यसैले पत्रिकाको लागि राशिफल राम्रो मसला हो । यसैले राशिफल बिनाको पत्रिका सायदै हुन्छन् । तर विश्वास गर्नेले विश्वास गरे झै संवेदनशिल भएर लेख्छन् त राशिफल लेख्नेले ?

राशिफलको मसला पनि अचम्मको छ । संसारमा लगभग ७ अरब मानिसहरु छन् । राशिफल जम्मा १२ वटा । भाग लगाउँने हो भने सालाखाला ५० लाख भन्दा बढि मानिसहरुको राशि एउटै हुन्छ । यति धेरै मानिसको दैनिकीका बारेमा निकालिने औसत दैनिक राशिफलहरु बलैले एक हरफ हुन्छन् । अझ कतिपय पत्रपत्रिकाहरु त यति खर्रो र साक्षात् हुन्छन् कि जम्मा दुई शब्दका राशिफल निकालिदिन्छन् । कस्तो अचम्मको राशिफल, ५० लाख भन्दा बढिका लागि २ शब्द । यदि त्यो राशिफल मिल्ने हो भने संसारका ५० लाखभन्दा बढि मानिसहरुको दैनिकी उस्तै हुनुपर्ने हो । यो त मानिसलाई भेडाको बथान सम्झिए जस्तो भएन र ?

पुर्वाञ्चलबाट प्रकाशित हुने एकदैनिक पत्रिकाका साथीले भन्थे, बाजेले बेलामा राशिफल नपठाईदिएर कनिकनि १२ वटा राशिफल निकाले । कुनै पहिलेकै दोहोरिए कुनै फुराएँ । राशिफल कसरी निकालिन्छ भन्ने कुरालाई राष्ट्रिय दैनिक पत्रिकाका एक बरिष्ठ सम्पादकले आफ्नो उपन्यासमा पनि खुलाएका छन् । उनको उपन्यास पढ्नेले थाहा पाउँनु हुनेछ ।

कुनै पत्रिका(चलेको राष्ट्रिय दैनिक, जसले आफुलाई नेपालको सबैभन्दा बढि बिक्री हुने भनि दाबी गर्छ ।)ले पत्रिकामा अघिल्लो दिनको राशिफल हुबहु पनि निकाल्ने गर्छ । तर, उसले त्यसको माफी मागेर भोली पल्ट सच्याउँदैन । जसलाई पढ्नेले हिजो झै विश्वास गरे आज पनि पढ्लान् । उनीहरुलाई के छ र पत्याईदिन्छन् । तर जान्नुपर्ने कुरा यो हो कि राशिफल सबै पत्रिकामा निस्किए पनि तिनीहरुमा लेख्ने वा छाप्नेले पत्याउँनेले पत्याए जस्तो संवेदनशिलता देखाएका हुन्नन् । उनीहरुलाई पनि थाहा छ, राशिफलले दैनिक जीवनमा कति असर पार्छ । राशिफल त मानिसको विश्वासलाई नगदिकरण गर्ने काम मात्र हो । यसैले लेख्नेले त लेखेपछि स्वार्थ पुरा गर्छ । तर मुख्य सोच्नु पर्ने बिषय यो हो कि, सबै कुरा पहिले नै लेखिएको हुन्छ भनेर भाग्यवादी भई किन मानिसको शक्तिलाई कम आक्ने ?

Paniphoto.com