आफूले मन पराएकी युवतीले बिहे गर्न नमानेपछि

आफूले मन पराएकी युवतीले बिहे गर्न नमानेपछि एक सैनिकले प्रेमिकाकै दिदीकी छोरी अपहरण गरेका छन् । नुवाकोट तलाखु घर भई मकवानपुरस्थित नम्बर-७ बाहिनी अड्डा, चनमन ब्यारेकमा प्राविधिक अमल्दारका रूपमा कार्यरत २३ वर्षीय कुमार श्रेष्ठले मकवानपुरकै प्रेमिकाको घरबाट ६ वर्षकी बालिकाको अपहरण गरेका हुन् ।

श्रेष्ठले केहीअघि प्रेम विवाह गर्ने भन्दै युवतीलाई नुवाकोटस्थित आफ्नो घर लगेका थिए । घर पुग्दा श्रेष्ठकी श्रीमती र दुई वर्षकी छोरी रहेको थाहा पाएपछि ती युवती उनीसँग बस्न नमानी फर्केकी

थिइन् । तैपनि श्रेष्ठले बिहेको जिद्दी गरिरहेपछि युवतीकी दिदीले उनलाई रोकेकी थिइन् । बहिनीसँग बिहे गर्न नदिएको झोंकमा श्रेष्ठले दिदीकी छोरी अपहरण गरेको अनुसन्धानबाट खुल्न आएको छ ।

अपहरित बालिकालाई सशस्त्र प्रहरी बलको विशेष टोलीले मंगलबार काठमाडौंको मनमैजुबाट सकुशल मुक्त गरेको हो । टोलीले अपहरणमा प्रयोग भएको मोटरसाइकल र ४ थान मोबाइल बरामद गरेको छ ।

अनुसन्धानमा संलग्न बाघभैरव गुल्मका डीएसपी विदुर खड्कका अनुसार बालिका अपहरण गरेर काठमाडौं ल्याएपछि श्रेष्ठले 'मेरो प्रेमिका पठाइदेऊ, नत्र बालिका मारिदिन्छु,' भन्दै धम्की दिएका थिए ।

अपहरणपछि बालिका लुकाउन सघाएकोमा प्रहरीले श्रेष्ठका आफन्तहरू र घरधनी समेतलाई पक्राउ गरेको छ । पक्राउ परेकामा कुमारकी दिदी पार्वती, साथीहरू रमेश श्रेष्ठ, सुवास श्रेष्ठ, घरधनी छत्रलाल श्रेष्ठ र उनकी श्रीमती सरला छन् । उनीहरू सबैलाई महानगरीय प्रहरी प्रभाग दरबारमार्गमा राखिएको छ ।

अपहरित बालिकाका अभिभावकले खोजीका लागि नेपाल प्रहरी र सशस्त्र प्रहरी बल दुवैलाई अपिल गरेका थिए । अभियुक्त श्रेष्ठ भने आफू कार्यरत ब्यारेकबाट फागुन २२ गतेदेखि चैत ३ सम्मका लागि बिदा लिएर बसेका थिए ।