जलेर दाजुभाइको मृत्यु आमा बेहोस

हनुमानढोका संग्रहालयसँगै जोडिएको मखन टोलको एक घरमा आगलागी हुँदा एकै परिवारका दाजुभाइको निधन भएको छ।

शनिबार मध्यरातमा भएको आगलागीमा दुई छोरा गुमाएर वेदनाका कारण बेहोस भएकी आमालाई उपचारार्थ अस्पताल भर्ना गरिएको छ। शनिबार मध्यरातमा केदार श्रेष्ठको तीनतले घरमा आगलागी हुँदा उनका ३४ वर्षीय जेठो छोरा राजेश र २२ वर्षीय कान्छो छोरा महेशको जलेर मृत्यु भएको थियो। आगोको लप्काले जलेर छटपटाइरहेका छोराहरुलाई बचाउन नसकेपछि आमा ललिता बेहोस भएकी थिइन्।

धूवाँको मुस्लोले छातीमा समेत गम्भीर असर परेकी ललितालाई उपचारार्थ वीर अस्पताल भर्ना गरेपछि होस आएको छ।
मेरा दुई छोरा मरेर गए अब के गर्ने म त एक्लीजस्तै भएकी छु’ उपचारार्थ अस्पतालमा रहेकी ललिताले रुँदै भनिन्- भगवान्ले यो के गरेका मलाई ?

तीन छोरामध्ये मृत्यु भएका दुई छोरा छुट्टाछुट्टै कोठामा बस्दै आएका थिए। दुवै दाजुभाइको शव एकै ठाउँमा थियो। मृत्यु भएकामध्ये भाइ महेशको हातमा मोबाइल र दाजु राजेशको हातमा डिभाइस रहेको थियो।

आगलागीपछि दुवैका शव निकाल्दा चिन्नै नसकिने गरी जलेका थिए भने हातखुट्टा र शरीरका विभिन्न भाग छुट्टिएका थिए।
आगलागी भएलगत्तै हनुमानढोका दरबार सुरक्षार्थ खटिएको शार्दूलजंग गुल्मका गुल्मपति लालबहादुर भुजेल सहसेनानी राजु कार्कीसहितको १ सय १९ जनाको टोलीले उद्धार गरेको थियो। मध्यरातमा आगलागी भएको जानकारी पाउनासाथ सो गुल्मले उद्धारका सामग्री प्रयोग गरी घरका सामान बाहिर निकालेको थियो।